Church Submission Regarding the Samoa Constitution Amendment Bill 2020, Land and Titles Bill 2020, and Judicature Bill 2020 (2020 Draft Bills)

0
71

Folasaga e Faatatau i le Tulafono Taufaaofi o le Teuteuga o le Faavae 2020, Tulafono Taufaaofi o Fanua ma Suafa 2020, ma Tulafono Taufaaofi o Faamasinoga o Soligatulafono 2020

Mo le: Komiti Filifilia Faapalemene:

Auaunaga o le Soifua Maloloina ma Agafesootai, Mataupu o le Lotoifale, Atiinae o Nuu ma Tagata Lautele

Mai:   Ekalesia A Iesu Keriso o le Aupaia o Aso e Gata Ai

Iulai 30, 2020

  1. Faatomuaga

Matou te molimoli atu le agaga faafetai mo lenei avanoa taua e tuuina aloaia atu ai ni manatu ma tauaaoina atu ai se folasaga taualoa mo le silafia a le Komiti Filifilia Faapalemene e tusa ai ma Tulafono Taufaaofi 2020 e pei ona taua i luga. O lenei folasaga taualoa e tuuina atu i le agaga faaaloalo lava ma le migao e tatau ai, e fai ai ma fofoga o le Ekalesia a Iesu Keriso o le Aupaia o Aso e Gata Ai ma le loaloa o le toatele o tagata Samoa o e o lo o soifua faamanuiaina ma ola ai i lo latou faatuatuaga ia Iesu Keriso o ni uso ma tuafafine o le Ekalesia i Samoa. O nei tagata o le Ekalesia ua tapuai faatasi i le sili atu ma le 150 faapotopotoga o le Ekalesia i Samoa ma faatauaina ai le avea ai o i latou o ni tagatanuu o Samoa. E faapei o le faatulagaga aoao o le Aukerisiano, o lo o iai tagata o le Ekalesia o lo o nopiai i tafa e fia o le kelope.

Ua le po malae ua matua le talafaasolopito faatulagaina o tagata o le Ekalesia i Samoa e afua mai le aso 17 o Iuni i le tausaga e 1888, ina ua faavae aloaia le misiona a le Ekalesia i Samoa, ma avea ai Apia ma ona ofisa tutotonu. Sa auai tagata o le Ekalesia ma lagolagoina le soalaupuleina ma taunuu atu ai i le talia o le Faavae o Samoa ma aloaia ai i le aso 1 o Ianuari i le 1962, ma faafetaia ai faamanuiaga o le soifua ai i lalo o lana puipuiga saogalemu i le sili atu ma le 50 tausaga. Ua manino le talafaasolopito o auaunaga faatino o tagata o le Ekalesia e saili e avea ai ma ni tagatanuu tauaogaina o Samoa, e faamamalu i ana tu ma aganuu masani, ma naunau e saili auala e galulue feoeoeai ai ma isi tagata e faatupulaia ai le agaga o le alofa, soifua auauna, toafilemu, galulue felagolagomai, fetausiai, ma le faaaloalogia o le puipuiga ma le mamalu o tagata Samoa uma e tusa ai ma tu ma aganuu o le soifuaga Faasamoa,     

O lo matou faamoemoega autu i lenei folasaga taualoa o le siitia ae lea ma le faaleoina i le agaga faaaloalo o se lapataiga e faapea o le talia aloaia o le Tulafono Taufaaofi 2020 o le a lamatia ma afaina ai le faatinoina ma le puipuiga o aia tatau faavae a le tagata soifua ua faamaonia mai ma faamamaluina e le faavae ma le tuuto faavaomalo, e aofia ai ma le saolotoga o lotu e tapuai ai.  

Matou te valuvalusia ai aa o le fau i le agaga faaaloalo lava ina ia tausia pea lava pea o tu ma aganuu e masani ai Samoa e toomaga i ai le puipuiga o aia tatau faavae a tagata soifua e pei ona tuuina mai e le Faavae o Samoa e tusa ai ma ana tu ma aganuu e masani ai.

  1. O le Fesootaiga Vavalalata o le Faavae o Samoa ma Ana Tu ma Aganuu Masani e Mafai ai ona Maua se Atunuu Toafilemu e ui ina Eseese 

            O le Faavae o Samoa mai lava i lona amataga nate opogi le Faasamoa i auala loloto. O lona faatomuaga o lo o faapea mai e faavae lea i luga o “Mataupu Faavae Faakerisiano ma tu ma aganuu masani a Samoa”. E pei ona taua i le Mataupu 2 o le Faavae “O lenei Faavae o le a avea ma tulafono aupito maualuga o Samoa.” Na aloaia lenei Faavae e tuaa iloga na asa le vaofilifili o Samoa, e aofia ai sui mamalu mai afioaga ma itumalo o Samoa. Na loloto feutagaiga ia Samoa atoa e aofia ai le tele o tausaga i aai, afioaga, ma itumalo, ma i le paia ma le mamalu o Alii ma Faipule – faatasi ai ma le finagalo o tagatanuu uma e ala lea i le pelepesite. Sa tagai ma le totoa taitai faale-tulafono ma faale-aganuu i tuutuuga o le Faavae fou o Samoa. O lenei galuega fita na afua ai se faatulagaga o le pulega faavae ma avea ma mafuaaga e aloaia ai tulafono faavae ma le faale-aganuu aua o faamanuiaga o nei vaega e lua ua mamanu faatasi i ni auala e alagatatau ai ona felagolagomai ma fepuipuiai vaega aupito silisili ona maualuga i tulaga faatauaina o Samoa ae o lo o mautinoa ai le puipuiga o le mamalu ma aia tatau faavae o tagatanuu uma o Samoa i lalo o le tulafono. E pei ona faamamafa mai e le Sosaiete a Loia o Samoa i la latou mau lata mai, “O aia tatau faavae a le tagata soifua ua le na o ni manatu taualoa mai fafo… ua mauaa foi i latou i totonu o le aganuu a Samoa.”[1]

Ua o gatasi le lagona o le Ekalesia ma le finagalo e pei ona folasia e le Komesina o Sulufaiga o Samoa i lana lipoti i Aia Tatau a Tagata Soifua o le 2019 pe afai e manino lelei iai, “o aia tatau a tagata soifua ma le Faasamoa e tutusa pau i agafaavae ma o lea ua fesootai lelei ai lava.”[2] I lona tulaga moni, e pei ona faamaonia e le Komesina o Sulufaiga, o nei manatu e lua e felagolagomai ma fefaamalosiai le tasi i le isi.”[3] Ua iai lo matou popolega e pei ona tusia o le a talepe e le Tulafono Taufaaofi 2020 lenei fegalegaleaiga fesootai taua ma faatapulaaina ai le faataunuuina ma le puipuia o aia tatau faavae ua faamaonia mo tagata uma o lo o soifua, tapuai, galulue ma atiae i totonu o Samoa.[4]

Matou te matauina o lo o sailia le finagalo lautele o Samoa e tusa ai ma Tulafono Taufaaofi 2020 ma e matou te fiafia ua mafai ona faaopoopo iai lo matou leo faatasi ma isi. Matou te matauina foi o lo o manino le matafaioi tuuto faavae ma faavaomalo taua a Samoa e faatatau i le saolotoga o lotu, e aofia ai ma Mataupu o le Faavae o Samoa 11-13 ma o loo iai foi ma le aafiaga o Samoa i le Feagaiga Faavaomalo i le Aia Tatau o Tagata Lautele ma Faaupufai “(ICCPR”), lea e faatinoina e ala i le maliega faamauina e tuuto i le Faasilasilaga o Aia Tatau Faalauaitele (“UDHR”) na aloaia e le Faalapotopotoga a Malo Aufaatasi i le 1948.

Matou te lagolagoina le mau a le Komesina o Sulufaiga a Samoa i lana Folasaga i lenei Komiti e faapea:

O aia tatau a Tagata Taitoatasi o se measina tutotonu a soo se atunuu/sosaiete. O tagata soifua taitoatasi, ua faia i le faatusa o le Atua, e tofutofusia tutusa uma i aia tatau faavae. O lea, e moni ai le faaupuga e faapea ‘Afai e te puipuia le tagata e toatasi ua e puipuia foi le nuu/sosaiete’. O le mafuaaga lea, ua faamausali ai saolotoga o le tagata e toatasi i soo se Faavae po o se Maliega (Charter) ua faaaloalogia ma faatauaina o se tulafono aupito i maualuga a soo se atunuu, e pei foi ona faatulagaina i le Faavae o Samoa.[5]

Matou te talosaga atu ina ia mafai ona tagai totoa ane i leo eseese uma ua ofoina atu o latou manatu e uiga i aafiaga e ono mafatia ai ona o le Tulafono Taufaaofi 2020. Matou te talosaga atu ina ia silasila le Komiti i ni aafiaga faigata nei a tolu e ono oo mai ona o le Tulafono Taufaaofi 2020 matou te talitonu ua fai ma taufaamatau i aia tatau faavae a tagata uma o e o loo fiafia i faamanuiaga o le soifua ma galulue ai i Samoa:

  1. E afaina ai le puipuiga o le saolotoga o lotu e ala lea i le aveesea o lo latou faamamaluina mai le pulega a le Faamasinoga Sili (tagai i le Vaega III i lalo).
  2. E afaina ai le puipuiga o aia tatau i meatotino ma le aia tatau i le faamasinoga tonu e puipuia ai meatotino a lotu ma alagatatau ai le amiotonu ma le faamautinoaina mo tagata uma (tagai i le Vaega IV i lalo).
  3.  O le faatulagaga tonu o le Faavae o Samoa ma lana tuuto faavaomalo e puipuia ai aia tatau faavae a le tagata ua faaleaogaina ma ua mafua ai le vavao ma le mautonu. (tagai i le Vaega V i lalo).

Matou te talitonu foi e mafai ona faia suiga moomia i le faatulagaga o le Faamasinoga o Fanua ma Suafa e aunoa ma le aafia ai o le Faavae o faamautinoaina ai le puipuiga o aia tatau faavae a le tagata soifua po o le faatupulaia ai o ni faafitauli faatulagaina i le vatapuia o le faavae ma tulaga faaleaganuu o le atunuu o Samoa. (tagai i le Vaega VI i lalo).

  1. E Lamatia le Faamanualia e le Tulafono Taufaaofi o le Puipuiga o le Saolotoga o Lotu e ala i le Aveesea o lo Latou Faamamaluina mai Pulega a le Faamasinoga Sili

O se tasi o aia tatau faavae ua tuuina atu, faasaoina ma faatumauina i le Vaega II o le Faavae o Samoa o le aia tatau o le saolotoga o lotu o lo o iai i le Mataupu 11, e faapea:

E i ai i tagata taitoatasi uma le aia tatau i le saolotoga o mafaufauga, loto fuatiaifo ma lotu; e aofia i lenei aia tatau le saolotoga na te suia ai lana lotu po o le talitonuga, ma le saolotoga, pe na o ia po o le auai faatasi ma nisi, ma o le itu i le tulaga faalauaitele po o le faasino ia te ia lava, ia faamalamalamaina ma talai lana lotu po o le talitonuga i aoaoga, tapuaiga ma le tausisi i ai.

Ua matauina foi ona e leai se vaega o le Tulafono Taufaaofi 2020 o suia ai le Mataupu 11, o lea e leai ai se suiga i le puipuiga o le saolotoga o lotu. O aia tatau a tagata taitoatasi uma i le saolotoga o lotu ua faamalosia lava e le pule ua iai e faamalosia ai lena saolotoga. O le Mataupu 4 o le Faavae o Samoa ua faamautinoa ai o soo se tagata e mafai ona talosaga i le Faamasinoga Sili e faamamalu ai lo latou saolotoga o lotu ma isi aia tatau e tusa ai ma le faavae. E ui o le faamautinoaina faalauaitele o le Mataupu 11 e faatatau i le saolotoga o lotu e le o suia, o le Mataupu 4 o le Faavae ua suia nei. O le gagana fou ua taofia ai le Faamasinoga Sili mai le taulimaina o soo se mataupu ua tuuina atu i le Faamasinoga o Fanua ma Suafa. I le siata o lo o faaali atu i lalo o le gagana o lo o faaaogaina i le taimi nei e le Mataupu 4(1) o lo o faaali atu i le itu tauagavale ma le faaopoopoga fuafuaina i le Tulafono Taufaaofi 2020 o lo o tuuina atu i le itu taumatau.

Faavae o Samoa 1961, Mataupu 4(1)

Suiga Fautuaina i le Mataupu 4(1)

“Faiga e fai ai le faamamaluina o aia tatau –

(1) E mafai e so o se tagata ona talosaga i le Faamasinoga Sili i taualumaga tatau ina ia faamamaluina aia tatau e pei ona tuuina atu e tusa ma aiaiga o lenei Vaega”

[faaopoopo le vaseina o upu, ma le Vaega o le Tulafono Faavae o lo o taua ai Aia Faavae],

“Faiga e fai ai le faamamaluina o aia tatau –

(1) I le noatia ma fuafua ai i mataupu o iloiloga faa-faamasinoga e faatulai mai i taualumaga i le Vaega IX- Faamasinoga o Fanua ma Suafa, so o se tagata

e mafai ona talosaga i le Faamasinoga Sili i taualumaga tatau e faamamaluina ai aia tatau e pei ona tuuina atu e tusa ai ma aiaiga o lenei Vaega.”

[faaopoopo faamatalaga i le lanu mumu]

I le suia ai o le Mataupu 4 o le Faavae i lenei auala, o le a le faamatuuina atu ai e le Tulafono Tufaaofi 2020 i se faamasinoga le manulauti ma le malosi e galue e faapei ona sa faia pea lava pea e le Faamasinoga Sili mo Samoa i le sili atu ma le 58 tausaga. E tusa ai ma lenei suiga i le Mataupu 4, matou te malilie autasi i le faaiuga a le Komesina o Sulufaiga e faapea “e foliga mai o lea faamoemoe o le a lē toe mafai ai e tagatanuu [poo seisi tagata]ona faia talosaga i le Faamasinoga Sili, poo se isi tulaga mo le faamamaluina o a latou aia tatau faavae, e faatatau i mataupu e paū tonu i lalo o le pulega faa-faamasinoga o Fanua ma Suafa.” (faaopoopo le faamamafa)[6]

E faapea foi, pe afai o le a taliaina Tulafono Taufaaofi 2020, o le faaupuga “Sei Vagana ai le Vaega IX Faamasinoga o Fanua ma Suafa ma Tulafono o lo o faafoeina ai i lalo” (po o le gagana faapea) o le a faaofi i totonu o le Mataupu Faavae e faamatuu atu ai pulega i le Faamasinoga Sili ma le Faamasinoga o Talosaga.[7]

E faapea foi i le Mataupu 81 o le Faavae o Samoa o iai nei o lo o faamatala mai ai “Pulega e Uiga i Aia Tatau Faavae” ua tape ese. O le Mataupu 81 ua faaalia mai ai nei e faapea “O le faia o se talosaga i le Faamasinoga o Talosaga faasaga i so o se faaiuga a le Faamasinoga Sili i so o se taualumaga e tusa ai ma aiaiga o le Mataupu 4.” O lenei aiaiga ua aveesea mai lona tulaga o iai nei o se faamaoniga tutoatasi faale-tulafono o aia tatau faavae ma ua faatauvaaina i se faauigaina o le pulega o le Faamasinoga o Talosaga. (Mataupu 76(1)(c). E faapei o le suiga o le Mataupu 4 o i luga, ma le aveesea mai le latou pulega o le matafaioi e iloilo ai mataupu uma sa fofogaina i le Faamasinoga o Fanua ma Suafa i sona aotelega, o le faaitiitia o lenei aia tatau tutoatasi faale-tulafono a le Faamasinoga o Talosaga e fofogaina ai mataupu e uiga i aia tatau faavae o tagata soifua e tusa ai ma le tulafono ua faaleaoga teleina i le aveesea lea mai le pulega o mataupu e mapuna mai le faatulagaga a le Faamasinoga o Fanua ma Suafa.

I le faagasologa  e sili atu i le limasefulu tausaga talu ona aloaia le Faavae o Samoa, sa taulimaina pea lava pea e le Faamasinoga Sili le tulaga maoae o le saolotoga o aia tatau o lotu i lalo o le Mataupu 11.[8] E pei ona folasia e le Komesina o Sulufaiga i lana lipoti o le 2015 i le Aia Tatau a Tagata Soifua i Samoa, “O le faatapulaaina po o le taofiofia o saolotoga o lotu ua feteenai lea ma aia tatau a tagata soifua e tatau ai ma ua le faatemokarasi.”[9] O le aveesea o le pule faataga o lo o iai nei a le faamasinoga Samoa i le va o tagata ma soligatulafono e fofoga ai tagi ma talosaga ina ia faamamaluina ai aia tatau faavae faale-tulafono ona ua aliae mai le Faamasinoga o Fanua ma Suafa e mafai ai ona avea se mataupu a se tagata o lo o i luma o le Faamasinoga o Fanua ma Suafa e aveesea ai lana aia tatau i lona saolotoga o lotu e fofogaina ai e le Faamasinoga Sili ma le Faamasinoga o Talosaga lana mataupu.

Matou te le talitonu o nei atugaluga o ni mea ua faufau. O ni faataitaiga o mea moni ua tutupu ua avea ai le siitia ae o aia tatau faalenuu ua aafia ai aia tatau faavae a tagata taitoatasi, ua feteenai ma le faamautinoaina o le amiotonu faale-tulafono, e aofia ai le 1) faasaina ona uia pe solia laueleele o le afioaga po o le tuua o le afioaga ina ia auai i le lotu i seisi afioaga tuaoi, 2) faasalaina pe faamalosia le o ese mai o latou aiga ona ua auai ma liliu atu i seisi lotu, 3) faasaina ona asiasi pe talai i totonu o se afioaga, 4) le mafai ona fausia se falesa i totonu o se afioaga, 5) faatonuina ina ia auai i le lotu e tasi o lo o i totonu o se afioaga. Ua matou saili e puipui ma faamalosia mo augatupulaga faimai le tomai o matou tagata auai, o a latou fanau ma fanau a latou fanau ina ia tatalo, suesue i tusitusiga paia ma auai i se lotu o la latou filifiliga e auala i le puipuia lelei o a latou aia tatau o lo latou tofi mai le Atua e pei ona puipuia malu ai mo tagata uma e le Faavae o Samoa.[10]

O nisi o nei tulaga na fai ma mataupu o faaiuga a Faamasinoga Sili ua mavae, Sefo v. Faamasinoga o Fanua ma Suafa[11] o se faataitaiga faapea. Na manatu le Faamasinoga Sili o le agaga finau o taitai faaleaganuu i le Faamasinoga o Fanua ma Suafa se manu e fai ma mea e soloia ai le “vasega tusipaia po o le faatuina o le lotu fou…i le afioaga o Saipipi” ua solia ai le Mataupu 11 o le Faavae. E faapea foi, o le aiaiga e faapea e sailia e se lotu fou le maliega a Alii ma Faipule e faataga ai le amataina o se aoga tusipaia po o sauniga faalelotu (i totonu o fanua o tagata taitoatasi po o fanua faaleaganuu) ua solia ai le Mataupu 11. E faamaonia lea e tusa foi pe fai ma “popolega e ono tutupu ai ni vevesiga po o ni feeseeseaiga.” Ana avea le agaga finau a le Faamasinoga o Fanua ma Suafa i lenei mataupu ma tulai mai ai se faaiuga, po ua tapunia ai le saolotoga o lotu o i latou o talitonu ai i lenei lotu fou i le afioaga.

O nisi foi faafitauli na lipotia mai e le Komesina o Sulufaiga i lana Lipoti o le Tulaga o Aia Tatau a Tagata Soifua 2015. E tusa ai ma feutaga’iga ma afioaga, na ia maua ai e faapea:

“na tula’i mai ai le matā’upu e uiga i le sa’olotoga o filifiliga ma sa’olotoga mai le fa’amalosi o lotu. E iai tagata o nu’u na lipotiina na’o le tasi le lotu e filifili i ai i o latou nu’u, po o le fa’asāina fo’i o le fa’avaeina o ni lotu fou, a o isi nu’u e fa’ataga ona lolotu i isi lotu i fafo atu o le nu’u. O isi taimi, e leai se sa’olotoga e filifili ai se lotu e to’aitiiti tagata, ‘auā na’o le tasi le lotu e fa’ataga i totonu o se nu’u pe fa’atapula’a fo’i le ofi atu o ni lotu fou i totonu o le nu’u.”[12]

O nisi faafitauli faapea o lo o faamauina i le Lipoti faaletausaga a le US o le Saolotoga o Lotu o le 2019.[13]

            Mo faapotopotoga faalelotu – pe o tatou lava po o nisi foi – e matua le talafeagai ona manatu o le a iai se pa pupuni faale-faamasinoga ua fausia faataamilo i le faatulagaga e faia ai faaiuga a le Faamasinoga o Fanua ma Suafa. O lea pa pupuni faale-faamasinoga o le a afaina ai le puipuiga o le saolotoga o lotu e ala i le taofia o se tagata po o se faapoptopotoga mai le faia o se talosaga faale tulafono i le Faamasinoga Sili ma le Faamasinoga o Talosaga a Samoa ma taofia ai i latou e aunoa ma se isi auala alagatatau e puipuia ai ia saolotoga. Ona o lo tatou le faia o mea uma e ao ona tatou fai e puipuia ai le saolotoga o lotu, ua tatou popole ai loa i le teena o saolotoga faavae o lotu i le avea ai ma faiga faatino e masani ai.

Tatou te manaomia pea lava pea le puipuiga o le saolotoga o lotu e pei ona tuuina mai e lo tatou Faavae. Ua faataatia e le Tulafono Taufaaofi 2020 i tagatanuu o Samoa fuaitau matagofie o le Mataupu 11; ae o le faanoanoaga, o soo se tasi e auai i le Faamasinoga o Fanua ma Suafa, ua aveesea ai le gafatia e faamamaluina ai ia fuaitau.

  1. E Lamatia le Afaina e le Tulafono Taufaaofi 2020 o Aia e Uiga i Meatotino ma le Aia i Faamasinoina ma le Tonu e Puipuia Meatotino a le Lotu ma Tuuina atu le Amiotonu ma le Faamautinoaina mo Tagata Uma                                                                       

A. E Faaleaogaina e le Tulafono Taufaaofi 2020 Aia e Uiga i Meatotino ma Faapea ai le Faatinoina o le Saolotoga o Lotu

E taua le puipuia o aia tatau o meatotino i lona faataunuuina ma le fiafia o le saolotoga o lotu. O tagata e tapuai faatasi e manaomia se nofoaga malu puipuia e faatasi ai. O lea, o le saolotoga o lotu ma le aia tatau o meatotino e fesootai vavalalata. E mafai e le Tulafono Taufaaofi 2020 ona faaofi mai le mautonu i le faatulagaga o meatotino ma lisi. E taua le mautinoa o aia tatau e faatatau i fanua i tagata taitoatasi, aiga, pisinisi, ma faapotopotoga faalelotu. E mafai ona aliae i se tulaga faanatinati lisi taualoa faaumiumi i ni luitau le maalofia pe a tuuina mai i le Faamasinoga o Fanua ma Suafa.

O se faataitaiga o lenei taufaamatau i aia tatau o meatotino ua faailoa mai le Tulafono Taufaaofi 2020 e pei ona faaalia mai e le mataupu talu ai nei a Lemalu Saeni v. Su’a Pale Ltd. ma le Faamasinoga o Fanua ma Suafa ma isi.[14] I lea mataupu sa atiae ai e Sua Pale Ltd. (“SPL”) se mataaga e taua o le “Return to Paradise Beach Club” i luga o fanua faaleaganuu sa latou lisiina. I le maofa ai o le SPL, sa malosi le talitonuga o le Faamasinoga o Fanua ma Suafa i se luitau na faatoai mai e le aiga o Saeni e faapea o le lisi sa lesitalaina “ua faamutaina ma ua le aoga.” O le talosaga mai lenei faaiuga sa faaleaogaina e le Faamasinoga Talosaga o Fanua ma Suafa i le aso 25 o Iulai 2014.

Na faatoai e le aiga o Fa’alafua ma le SPL le tagi i le Faamasinoga Sili e faapea o le 1) aia tatau a le SPL i se faamasinoga tonu i lalo o le Faavae o Samoa ua solia (ona o se pisinisi e le Samoa, sa le aofia ai le SPL i taualumaga o Faamasinoga o Fanua ma Suafa); 2) e leai se pulega a le Faamasinoga o Fanua ma Suafa e iloilo ai le lisi pe afai ua faaui i tua le muai faasea a le aiga o Saeni; ma 3) o le taimi lava e tuuina atu ai e le Minisita le lisi, e leai se malosi o le Faamasinoga o Fanua ma Suafa e faamuta ai. Ua tautino mai e le faamasino o le Faamasinoga Sili e faapea e leai se pule o le Faamasinoga o Fanua ma Suafa i le lisi a le Minisita pe afai ua faamaonia. I le manatu ai i le taua o le tulaga faaletonu o mea tautupe ona o se faaiuga feteenai, na faasino ane e le faamasino e faapea “o le taofia ai o le a fai ma aafiaga matuia i le aoga o le lisiina o fanua faaleaganuu ma le faaosofia ai o i latou e ona lisi e atiae ai i latou.[15] I le talosaga, sa faamaonia mai e le Faamasinoga o Talosaga Samoa e faapea e leai se pule a le Faamasinoga o Fanua ma Suafa e faamuta ai le lisi ua faamaonia e le Matagaluega. Ua faamamafa mai e le Faamasinoga e faapea “[o]le fuafuaga faapea o nei lisi e mafai ona faamutaina e se faaiuga o le Faamasinoga o Fanua ma Suafa o le a fai ma mea matuia e faamuta ai le fiafia e atiae ai ma faaofi mai ai le mautonu.[16]

            Ua faaalia e le Faamasinoga o Talosaga le faaaloalo mo le paleni talafeagai ua iai nei i le va o le Faamasinoga o Fanua ma Suafa ma le faatulagaga faaletulafono o faamasinoga Samoa i le faapea mai e iai pea le taua faale pulega o le Faamasinoga o Fanua ma Suafa … [e] faailoa ai aia tatau i le va o i latou e ona ma i latou e foliga mai e ono faamanuiaina ai” ma faailoa “po o ai e aia i le fanua pe a maea le lisi” ma foia se auala “e tufatufa ai tupe maua o le lisi mo le taimi nei.”[17]  

A o aloaia e le Faamasinoga o Talosaga le tulaga masani ona iai i le Faamasinoga o Fanua ma Suafa le pulega maioio i mataupu ma feeseeseaiga uma i tagata Samoa e faatatau i fanua faaleaganuu,”[18] ua manino foi lana pulega e faalavefau ai i mataupu iloga faapitoa, o le tele o nei mataupu e afua mai “pe afai ua solia le Faavae. Afai o lea, e manaomia e le Faavae le Faamasinoga Sili e tulai mai mo se fofo o le faafitauli.”[19] Ua faamamafa mai e le Faamasinoga o Talosaga i le mataupu a Lemalu Saeni le solia o le faavae e le Faamasinoga o Fanua ma Suafa ina ua tuuina atu se poloaiga ua sili atu i le pule faataga na faamatuu atu iai e le Faavae.[20] O lenei faapaleniina o aia tatau faavae o aganuu ma faatinoga e pei ona faailoa mai i lenei mataupu o le matafaioi lea a le Faamasinoga Sili ma le Faamasinoga o Talosaga. O lea tiute faapaleni ua le faamatuu atu i le Faamasinoga o Fanua ma Suafa e le Tulafono Taufaaofi 2020.

O le faaiuga o se mataupu talafeuga talu ai na tulai mai ai le solia o le aia tatau faavae ma avea ma mea ua faatapulaa ai le pule faataga a le Faamasinoga o Fanua ma Suafa sa aafia ai la matou Ekalesia. Sa faia le faaiuga e le Faamasino Sili le Afioga ia Patu Sapolu i le 2009 ma sa faailoa mai i le mataupu a Lemalu Saeni (“e taua o le mataupu a le “Aupaia o Aso e Gata Ai”).[21] E faapei o le mataupu a Lemalu Saeni, sa faafoliga e le Faamasinoga o Fanua ma Suafa i le mataupu a le Aupaia o Aso e Gata Ai e faaleaoga ai se lisi sa faamaonia mai e le Minisita o Eleele o vaaia fanua faaleaganuu e tusa ai ma le Tulafono o le Faaliliuina o Fanua Faaleaganuu 1965. O le faaiuga a le Faamasinoga Sili e faapea o le faia o lea mea, ua sili atu i luga o lana pule faataga, ma o le solia lea o le faavae o se matafaioi a le Faamasinoga Sili e foia. Ia iloa ai ua le na o le puipuia o aia tatau o meatotino (lisi o fanua) e moomia ai le faalavefau a le Faamasinoga Sili, ae faapea foi i le solia o pulega faatulagaina e pei ona faamautu mai i le Faavae.

Afai o taualumaga faa-faamasinoga uma e aafia ai i soo se tulaga e faasino i mataupu o fanua faaleaganuu ua faapumoomoo i le Faamasinoga o Fanua ma Suafa, o lona uiga la o soo se aia tatau faavae e puipuia e le Faavae e mapuna ae i le faatulagaga o Faamasinoga o Fanua ma Suafa o le a lafoaiina e aunoa ma le puipuiga a le faamasinoga ua faatuina e le Faavae e puipui e le na o aia tatau faavae o tagata soifua, ae faapea foi i le faapaleniina o pulega i se atunuu/sosaiete ua eseese. E pei ona tatou malamalama iai, sa le i fuafuaina le Faamasinoga o Fanua ma Suafa, pe ua faamatuu atu iai le pule e le Faavae po o le Tulafono Taufaaofi 2020 e avea o se faamasinoga faaletulafono ua iai le tomai o puleaga e foia ai talosaga e aofia ai aia tatau faavae a tagata soifua. O le pupuni eseina o le Faamasinoga Sili ma le Faamasinoga o Talosaga mai le puleaga o soo se mataupu faaletulafono e mapuna mai le Faamasinoga o Fanua ma Suafa o le a matuia ai le tafiesea o le puipuiga faaletulafono o aia tatau faavae e ono aliae mai i mataupu o le Faamasinoga o Fanua ma Suafa.

  

O le puipuiga o aia tatau o meatotino o e o lisiina fanua faaleaganuu o se vaega taua o le puipuiga o le saolotoga o lotu. O le tomai o le Faamasinoga Sili ma le Faamasinoga o Talosaga e faatapulaa ai le puleaga a le Faamasinoga o Fanua ma Suafa pe a lamatia aia tatau faavae ua talafeagai mo le puipuiga ma le faasaoina o ia aia tatau.

B. E Mafai ona Faaitiitia Aia Tatau Faavae mo le Faamasino Tonu e ala i le Toesea o Itu mai le Faamasinoga o Fanua ma Suafa

O le taofia ona auai o tagata uma o aafia i se feeseeseaiga o fofogaina i le faamasinoga o se mataupu o Faamasinoga o Fanua ma Suafa ua tuu itiitia ai le aia tatau faavae o le faamasino tonu ua faamaonia mai i le Mataupu 9 o le Faavae o Samoa. O le mataupu a Lemalu Seani o se faamanatu foi o lenei vaega. O se tasi o vaega autu i lena mataupu e faapea o le tulimatai e le Faamasinoga o Fanua ma Suafa o feeseeseaiga o tagata Samoa e mafai ona solia ai aia tatau o le faamasino tonu, ona o e lisiina fanua e le o ni tagata o aiga/nuu i Samoa e le mafai ona auai so latou leo i le Faamasinoga o Fanua ma Suafa.[22] E tusa ai ma le Faamasinoga o Talosaga “o le faamoemoega autu o le Faamasinoga o Fanua ma Suafa e le tatala atu ai aia tatau moomia mo tagata e ona meatotino ma e o lo o lisiina ae le o ni tagata o le aiga/nuu. O le fesootaiga i le va o le e ona le meatotino ma le tagata o lisi mai ai ae le o se tagata o le aiga/nuu o lo o puipuia e tulafono mai tulafono faalemalo ma tulaga masani.”[23] O lea, o se vaega o le faatulagaga o le Faamasinoga o Fanua ma Suafa e ogatotonu iai le puipuiga o le tofi o Samoa e foia ai feeseeseaiga i le va o tagata Samoa e faaaoga ai tu ma aganuu e foliga mai ua le mafai ai ona taofia le faia o le faamasino ua le tonu i mataupu e aafia ai e o lo o lisi ae le o ni tagata o aiga/nuu. O lenei, ua faateteleina e le Tulafono Taufaaofi lenei faafitauli e ala lea i le pupuni eseina o le Faamasinoga Sili mai lana matafaioi e faasao ai lenei le tonu.

O le auai o le o lo o lisi ae le o se tagata o le aiga/nuu mai le mataupu o feeseeseai ai e uiga i fanua i le Faamasinoga o Fanua ma Suafa e le gata o le a faamanualia ai i latou, ae faamanualia ai foi e o lo o faamanuiaina ona o le taumafaiga a i latou o lo o lisiina nei meatotino. Mo se faataitaiga, o i latou e mai fafo atu o Samoa o lo o atinae se mataaga, po o se falelotu i Samoa e faia ina ia faamanuiaina ai le soifua o tagata Samoa. O le faamatuu atu o a latou lisi ua mautu i ni luitau ae ua leva ona tuanai le taimi na faamaonia ma lesitalaina ai le lisi, ma i se taualumaga e faasaina ai i latou, e faamanualia ai le e ou nei pisinisi ma tagata o le lotu mo se taimi umi. O le faamoemoega o la matou Ekalesia o le fesoasoani lea i tagata ina ia maua le faaolataga ma le ola e faavavau. O nei faamoemoega paia ma le agaga lelei ua lamatia pe afai e faaitiitia pe aveesea la latou aia tatau o meatotino ma le agavaa e auai i lo latou faamamaluina.

  1.  O le Auivi Autu o le Faavae o Samoa ma lana Tuuto Faavaomalo o loo Puipuia ai Aia Tatau Faavae o Tagata Soifua ua Faaleaogaina ma Mafua ai Feeseeseaiga ma le Mautonu.

A. O le Auivi Autu o le Faavae ma le Muai Faatulagaga o le Faamasinoga Sili e Maua ai le Faavae Maopoopo ma le Mautonu mo Aia Tatau Faavae.

O le manuia o Samoa talu mai lona tutoatasi i le faafaileleina o tagatanuu eseese, faafeiloaia o tagata asiasi mai ma atinae, ma le fausiaina o se faatulagaga toafilemu ma le saogalemu o faamasinoga o se mea e mitamita ai. O le Faavae ma le tulai mai o se faatulagaga o faamasinoga tutoatasi o ni faavae taua ia o lea manuia. Matou te popoe i le lamatia e Tulafono Taufaaofi 2020 o le faatulagaga autu o le Faavae o Samoa, o le tuuto faavaomalo a Samoa i lalo o feagaiga, ma lona faasologa talafeagai faale faamasinoga.

Ua vaevae e le Tulafono Taufaaofi 2020 tiute faale faamasinoga ma pule i ni faatulagaga eseese e lua. E tofu le faatulagaga ma puleaga patino ae eseese. O lenei vaevaega o le tulaga faa faamasinoga ua avea ma mea ua le taofia ai le faavaivaiina o nei faatulagaga

O le faamatuu atu i se faatulagaga lona lua o faamasinoga o se pule ma tulaga tutusa ai ma le faatulagaga o faamasinoga o iai nei o le a faaulufale mai ai le toafimalie ma le mautonu. O le a le toe iai se faamasinoga e tulai mai ma faia faaiuga mulimuli – mo iloiloga, puipuiga ma le faamamaluina o le faavae e puipuia aia tatau faavae – e aofia ai ma le saolotoga o lotu. O faamoemoega taualoa o le toafimalie ma le mautonu o nuu ma sosaiete sa faamamaluina mai le taimi na aloaia ai le Faavae e auala mai i ona faatulagaga autu e aofia ai le tuueseeseina o pule, o le faavae o le tulafono ma le faamasinoga tutoatasi ua poto masani i tulafono moomia ma faiga masani. O le malamalama i vaega o faatulagaga o faamasinoga taitasi ma le tapulaa e pei ona aiaia e le Faavae ma faamamaluina e faamasinoga taitasi ua taua lea i le puipuia o aia tatau faavae.

Ua tuuina atu e le Tulafono Taufaaofi 2020 i le Faamasinoga o Fanua ma Suafa le pule sili i mea uma e faatatau i “aganuu ma le faaaogaina”, ae peitai o lea manatu ua le manino lava lona faamatalaina. E le faigata ona faailoa faafitauli o le a tutupu mai lenei pule ona o le pogisa o le faasalalauga ma le faalauteleina o lea fuaitau. E pei ona faailoa mai i le folasaga a le Ofisa o Faamasinoga Samoa o le faaaogaina o le upu “aganuu” i le Mataupu 72 o le Tulafono Taufaaofi ua faalautele atu ai ona itu uma o faiga faaiuga o le faamasinoga, e aofia ai vaega o le aia tatau taitoatasi i soligatulafono ma le va o tagata, ma mataupu o fefaatauaiga ma le gaosiga o oloa, e faapea foi ma mataupu o fanua ma suafa matai o aiga. O le a faaofi mai ai le mautinoa ma le lavelave i vaega o le Tulafono faa Samoa e sili mamao ese ai ma le faamoemoega o le Faamasinoga o Fanua ma Suafa i lalo o le Faavae o iai nei.[24] Ona e foliga mai e le mafai ona talosaga i le faatulagaga o faamasinoga o le faavae o Samoa ia mataupu ua fofogaina i le Faamasinoga o Fanua ma Suafa, e leai ni siaki ma faapaleni i le Faamasinoga o Fanua ma Suafa mo tagi e aafia ai aia tatau faavae faaletulafono.

O le ono faalauteleina o le aotelega o le Faamasinoga o Fanua ma Suafa ua atiae ai se feteenaiga ma le puleaga o le Faamasinoga Sili ma ona faamasinoga tau talosaga. E faailoa mai e faamasinoga taitasi le aotelega o la latou puleaga e tasi le mataupu i le taimi. O le laina tuaoi i le va o nei faatulagaga tau faamasinoga o le a matua nenefu lava. O le a faaopoopo iai e lenei le mautonu sili, avega, tuai ma le totogi i le faatinoga atoa o le faamasinoga.

I le ma lea, pe le alagatatau ea ona faia e le Faamasinoga o Fanua ma Suafa o faaiuga e iloa ai o iai lana puleaga e iloilo ai mataupu tau fanua o lo o aofia ai aia tatau faavae faale tulafono? Pe mafai ea? e ono mafai? e faamoemoe i ai? o le a tuuina atu e le Faamasinoga o Fanua ma Suafa le faataua sili i aia faaleaganuu – aemaise talu ai ”O le Tulafono tau le aganuu a Egelani ma le faamasinoga tonu tau le lotofuatiaifo, e lē faaaogāina i le Tulafono o Fanua ma Suafa.”[25] O faiga masani ua leva ona sau ai i le tele o tausaga i le talafaasolopito faale tulafono ma faale faamasinoga o Samoa ua mauaa i le tu ma aganuu anamua o tulafono tau la aganuu o le a le toe iai pe afai e tuuina mai se mataupu e aafia ai le saolotoga o lotu ma isi aia tatau faavae o tagata soifua i le Faamasinoga o Fanua ma Suafa.

O lenei taumafaiga i le totonugalemu o le Tulafono Taufaaofi 2020 ua faamoemoe e faamalosia ai le sootaga o Samoa i ona aa faaleaganuu o le a iai se aafiaga le manuia e vavaeeseina ai vaega o tu ma aganuu masani a Samoa e faatumauina ai le soifua – le faavae o le tulafono ma le tulafono tau le aganuu. I lea lava tulaga, o punaoa o aia tatau faale tulafono a tagata soifua ua loa ona faafailele mai le Fa’asamoa o le a vavaeeseina mai le puleaga a le Faamasinoga o Fanua ma Suafa ma o le a le toe iai e faamamalu, puipui, ma faalelei atili aia tatau faavae ua lagolago i le soifuaga o tagata.

Matou te popoe o le faatulagaga fou faale faamasinoga o le Faamasinoga o Fanua ma Suafa e le o se suiga lelei e fai ma ofisa o faamasinoga tutotatasi atoatoa ma le puleaga e moomia e le Faavae o Samoa lena puleaga nate tauaveina. Mo se faataitaiga, pe tonu ea ona iai o se vasega o faamasino o le Faamasinoga o Fanua ma Suafa e aofia ai ni faamasino se toalua ua iai le tomai o le Faamasinoga Sili, se tasi sa avea ma faamasino o le Faamasinoga o Fanua ma Suafa ma se tagatanuu o Samoa, e iloilo totoa ma faamautinoaina le puipuiga o aia tatau faavae faaletulafono? E faapefea pe afai ua tutusa ma ua leai se faaiuga e taunuu i ai? Afai e iai ni atugaluga e faatatau i tu ma aganuu masani e iloiloina i le Faamasinoga Sili, pe le ua sili ea ona lelei pe a faasaoina le faatulagaga o lo o iai nei ma le silafia o faamasino o le Faamasinoga Sili o i latou foi o ni matai? Pe le o tomai taua ea nei o faamasino o le Faamasinoga Sili e aumaia le silafia ma le malamalama o tu ma aganuu masani a Samoa i mataupu o lo o latou iloiloina? O le suia o lenei faatulagaga mo le faatulagaga fou o le Faamasinoga o Fanua ma Suafa ma faamoemoe i le vasega o faamasino e taulimaina talosaga faaletulafono ua avea ma ni galuega tele mo i latou – aemaise lava pe a leai se auala faaletulafono e maua ai se faaiuga lelei pe a feteenai.

O le vaeluaga fou o le lala o le faamasinoga o le malo e aunoa ma se faamasinoga i le tumutumu e faia faaiuga mulimuli ua faatuina nei e le Tulafono Taufaaofi 2020 o le a faatupulaia ai fevesiaiga ma le mautonu o se faatulagaga faale faamasinoga e taulimaina talosaga o aia tatau faavae i se tulaga le tumau, pe suia, pe ua leai lava se puipuiga, pe afai ua teena e le faamasinoga le avanoa o tagata e faamaonia ai a latou aia tatau faavae i soo se taimi e aafia ai mataupu tau le aganuu. 

B. O le Tiute Faavaomalo o Samoa e Tuuina mai ai se Faatonu Faaopoopo i Suiga Faaletulafono o le Faavae ua Fautua mai e le Tulafono Taufaaofi 2020

E taua ia i matou ona iloilo i lenei tulaga le tuuto faaletulafono faaumiumi a Samoa i le saolotoga o lotu e pei ona faaleleia ia Fepuari 2008, e Samoa ma siitia ai i le Feagaiga Faavaomalo o Aia Tatau i le va o Tagata ma le Faapolotiki (“ICCPR”). O lea na tauave ai tiute tuuto, o lona faamoemoega o le faatuina maliega faaletulafono tamau e puipuia ai aia tatau e pei ona faamatalaina mai i le Poloaiga Faalauaitele o Aia Tatau a Tagata Soifua (“UDHR”) ua talia aloaia e le Faapotopotoga Faalauaitele a Malo Aufaatasi i le 1948. O nei pepa o faamatalaga taitasi o lo o iai le Mataupu 18 ua patino mai ai le puipuiga o le saolotoga o lotu.

            Mataupu 18 o le ICCPR ua aumai ai lenei faamatalaga:

1. E i ai i tagata taitoatasi uma le aia tatau i le saolotoga o mafaufauga, loto fuatiaifo ma lotu. E aofia i lenei aia tatau le saolotoga e auai i se lotu po o se talitonuga o lana lava filifiliga, ma le saolotoga, pe na o ia po o le auai faatasi ma nisi, ma o le itu i le tulaga faalauaitele po o le faasino ia te ia lava ia molimauina ma talai lana lotu po o le talitonuga i tapuaiga, aoaoga, tapuaiga ma le tausisi i ai . (tagai i le faatusatusaga i le Mataupu 11, Vaega II o le Faavae o Samoa).

2. E leai se tasi e saisaitia i le faamalosia e faavaivaia ai lona saolotoga e auai i se lotu po o se tapuaiga o lana lava filifiliga.

3. O le saolotoga e molimauina ai se lotu po o se tapuaiga a se tasi atonu e saisaitia e tapulaa e pei ona tuuina mai e le Tulafono ma manaomia e puipuia ai le saogalemu o tagata lautele, nofo filemu, soifua maloloina, po o amio lelei, po o mo le puipuia o aia tatau ma le saolotoga o isi tagata.

4. O le Itu o le Setete i le Feagaiga o iai nei ua tauave ia faaaloalo i le saolotoga o matua ma, a talafeagai ai, tagata e tausia faale-tulafono ina ia mautinoa aoaoga faalelotu ma amioga talafeagai lelei o a latou fanau ua o gatasi ma a latou tautinoga.

I lona taua, ina ua malilie i lenei feagaiga faavaomalo, sa lei faatamala Samoa i le tuuto ua faia ma le faamamalu i so o se aia tatau faavae o tagata soifua e pei ona taua. O aiaiga o le saolotoga o lotu o le ICCPR (atoa ai foi ma isi aiaiga taua o aia tatau) ua faamauina faale-tulafono i Samoa, i lalo o le manatu faavae autu o le Tulafono o le feagaiga, pacta sunt servanda”. E pei ona tuufaatasia i le Fonotaga i Vienna e faatatau i le Tulafono o Maliega, o lenei mataupu autu e aumai ai “[o] maliega uma ua faamalosia ua faamauina i luga o sui auai o iai ma e ao ona faataunuuina e latou i le agaga lelei.”  O se vaega taua o lona faataunuuina o le faatinoina lea o faavae autu faale-tulafono a Samoa i se auala e faalauteleina ai lana tuuto i aia tatau a le tagata soifua. I lona tulaga taua, e aofia ai i lenei le faamautinoaina o tapulaa e faamatuu mai e le Faavae o Samoa e le o faaliliuina faalauaitele nai lo le faatagana e tuutuuga faavaomalo. A le o lea, o le faamamafaina o tapulaa o le a faaitiitia ai le puipuiga o le saolotoga o lotu.

Ua masani e faamasinoga Samoa ona faaaoga pea faavae o tulafono faavaomalo o aia tatau a tagata soifua (ma isi maliega faavaomalo) e iloiloina ai mataupu Samoa.[26] Ina ua maea ona matauina o nisi mataupu, na faapea mai le faamasinoga a Vailopa:[27]O nei faaiuga o lo o faaalia mai ai le faatinoina o aiaiga ma faavae o Maliega i sona tulaga faalauaitele ma le anoanoai o tulaga o mea tutupu. E o gatasi foi lenei ma le auala a le Pasefika ua maitauina ai le faaaogaina e isi pulega le Maliega ma ana tofa mamao i le tele o tulaga fataunuuina.”[28] O le faavae autu e faaaogaina ai le tuuto i tulafono faavaomalo ua faamaonia i le tele o mataupu. Ioe, i le mataupu a Wagner v. Radke sa faaaogaina ai e le faamasinoga le faavae autu o le Maliega Faavaomalo i Hague o le Aveesea Faamalosi o Fanau 1980, e ui e lei avea Samoa ma se sui auai.[29]  

Ua ia i Samoa se faamaumauga tauleleia ma le faifaipea o le mulimuli tui lea i lana tuuto i le maliega faavaomalo. E faamaonia lea aemaise lava i le ICCPR, o lo o iai le fatu o le tulaga o le a oo mai ua taua o le “Tulafono o Aia Tatau Faavaomalo.” Ona o aia tatau o lo o puipuia ai o lo o mauaa i lo tatou soifuaga ma le mamalu o le tofi faale-tagata, o le puipuia o le saolotoga o lotu ua faamoemoe e faatinoina ai i se tulaga faalauaitele. Ua le avea ia o se avanoa faapitoa o tu ma aganuu masani, lauiloa, po o vaega ua leva. O le mea moni o le faamaoniga tonu o le saolotoga o lotu i Samoa o le auala lea e tausia ai vaega toaitiiti ma tau le iloa.

Ma e faapea foi, matou te matauina i le Mataupu 11 o le Faavae o Samoa ma le Mataupu 18 o le ICCPR o lo o iloa ai o aia tatau o le saolotoga o lotu e le masalomia. O le faatulagaga ma le faaeteete o taofiofiga tatau i le faatinoina o le saolotoga o lotu o lo o faatagaina. I lea tulaga, o le Mataupu 11(2) o le Faavae o Samoa o lo o tuuina mai ai e faapea:

E leai se mea i le fuaiupu (1) o le a aafia ai le faagaoioiga o so o se tulafono o i ai nei po o le taofia ai o le Malo mai le faia o so o se tulafono pe afai o lena tulafono o lo o i ai nei po o le Tulafono ua faapea ona faia e tuuina atu ai o taofiofiga tatau i le faaaogaina o le aia tatau na tuuina atu e tusa ma aiaiga o lena fuaiupu mo le saogalemu o le atunuu po o le nofo filemu o tagata uma, soifua maloloina po o amio lelei, po o mo le puipuia o aia tatau ma le saolotoga o isi tagata, e aofia ai a latou aia tatau ma le saolotoga e faamamaluina ai ma faia la latou lotu e aunoa ma le soona aia fua i ai o tagata o nisi lotu.

E ui o le Mataupu 11(2) o le Faavae o Samoa e iai sina eseesega mai le Mataupu 18(3) o le ICCPR (o lo o sii atu i luga), e ao ona faitauina i auala e faamalosia ai le uiga autasi o ia aiaiga e lua. I lea tulaga, o le manatu o le “taofiofiga tatau” e masani ona malamalama iai o se mataupu o le tulafono faavaomalo e aofia ai na o taofiofiga o lo o talafeuga ma le faatulagaga o le tulafono, ma e matua talafeagai lava e faalauteleina ai le amiotonu o faamoemoega o lo o taua. I le tulaga faapitoa, o taofiofiga e faale-tagata, pe faapito, pe le manaomia e le tatau ona faatagaina,

O le faamatuu mai faale-tulafono i le Mataupu 11(2), ma le taofiofiga na te faaaloalogia, ua silafia, i se faataitaiga, i le Tulafono a Fonotaga a Nuu 2017, e matauina ai e mafai e le Fono a le Nuu ona fai faiga faavae po o iugafono e “faamalosia ai faavae autu o le faamasinoga tonu ma le amiotonu i le faiga ma taualumaga o faaiuga.”[30] E faapea foi, o le Tulafono o le Fono a le Nuu na te taulimaina le lesitalaina o ia tulafono faatonutonu “e le tatau ona faia e faapea o le atoaga po o se vaega o le faiga faavae po o iugafono ua o gatasi ma le Faavae.” E faapea, e tusa po ua lesitala, o faiga faavae po o iugafono o le Fono e manaomia pea ona mulimuli i le Faavae. O le lesitalaina o ia faiga faavae ma iugafono e le Fono a le Nuu e le otometi ona faamaonia lo latou faale-tulafono, ma e le puipuia mai le iloiloga faale-tulafono.

O le avea o le Faamasinoga o Fanua ma Suafa o Talosaga ma Iloiloga e fai ma faamasinoga sili o le atunuu i mataupu e tulai mai ma iloiloina e le Faamasinoga o Fanua ma Suafa, matou te popoe i le aafiaga le mautonu a le Tulafono Taufaaofi 2020 i le faatuina lea o se tulaga e mafai ona avea ai ma puipuiga e le tusa ai ma le tulafono o le Faamasinoga o Fanua ma Suafa mai soo se luitau faale-tulafono. O le avea o faaiuga a le Faamasinoga o Fanua ma Suafa o se faaiuga mulimuli, e mafai ai ona faapea I afai e solia e ia faaiuga le saolotoga o lotu ma isi aia tatau faavae, ua lagolagoina ai loa e le Tulafono Taufaaofi 2020 gaoioiga o soona fai, faailoga tagata, ma mulimuli ane ua le talafeagai ma le tusa ai ma le tulafono ma solia ai le aia tatau a tagata soifua.

            O lenei tulaga sa iloiloina talu ai e le Faamasinoga Sili a Samoa. Ua matauina ai le taua o le faamautinoaina o le aotelega o le “taofiofiga tatau” i le saolotoga o lotu ua faaeteete lelei lona faamalosia.[31] I le mataupu a Lafaialii v Loia Sili,[32] na fofogaina mai ai e le Faamasino Sili lenei manatu loloto i le manaomia o le faapalepale i le lotu i se atunuu ua faamalamalamaina:

E tutotonu i le manatu o le saolotoga o lotu o puipuia e le Faavae o le faapalepale, o le iloa o le malamalama ma le talia ai le meamoni e le o tagata uma o le a taliaina ma malilie i le talitonuga faalelotu e tasi e tusa lava poo i latou uma o Kerisiano. E ao i le tasi ona iloa ona faapalepale ma faaaloalo i talitonuga faalelotu o isi e tusa lava o ia talitonuga e ese mai lona lava talitonuga faalelotu. I lenei ala o le a faaauau le tumau ai pea o le filemu, feoeoeai ma le mautu i le nuu. O le a le taumate ona manaomia ai ni suiga o amioga a nisi o Alii ma Faipule ma nisi o faifeau o lotu autu o se mea e le sili atu i lo latou malosi ona gafatia. O le mea moni e le tumau lava le lalolagi; ae o lo o taavili pea. Ma o le ola ma le alualu i luma o le nuu e aofia ai le iloa ona faatonutonu ma faatatau i tulaga fou talafeagai ma manatu e musuia ai mai lea taimi i lea taimi o le soifuaga. Ua faailoa mai foi i talafaasolopito o le sauaina o tagata ona o latou talitonuga faalelotu sa le i faamanuiaina lava ina ia suia ai ia lava talitonuga ae ua na o le fai ma mea ua maua ai le faanoanoa tele ma le moomia, faigata ma puapuaga.[33]

            O nisi o taimi e malifa fefinauaiga i tu ma aganuu masani nai lo le puipuia o aia tatau faavae o le tagata soifua ua faatulagaina i le faafinau o aia tatau a tagata taitoatasi ma le manao e faasaga ia i latou o le nuu. E tupu feeseeseaiga i le va o manaoga o tagata taitoatasi ma manaoga faaleaganuu i nuu uma.  O nei tulaga e manaomia ai le faapaleniina ma le iloiloina ma le totoa. O lenei faapaleniina ma le iloiloina e mafai ona atoatoa lona faataunuuina i luga o se faavae mautu o faatulagaga atamai faale-tulafono ma le tofa poto aloaia. O se tulaga masani faale-natura o le tagata le vaai i o tatou manaoga e faapei lava o manaoga o le nuu, ma manaoga o isi ua na o ni manaoga “taitoatasi”. O faafitauli e faatatau i tagata e toatele e seasea ona foia e ala i le faamalosia ina ia usitaia, e le aofia ai i latou e ese o latou talitonuga, po o le pupuni ese o i latou mai ni manatu fou. O le faasaoina o le puleaga a le Faamasinoga Sili ma le Faamasinoga o Talosaga ina ia puipuia ai aia tatau uma faale-tulafono, e faapei foi ona lagolagoina e maliega faavaomalo ua tuuto iai Samoa, e taua i le puipuiga atoatoa e le gata i le saolotoga o lotu ae faapea foi i le soifuaga o tagata Samoa.

  1. O le toe Faatulagaina o Faamasinoga o Samoa o iai nei e Mafai ona Fai e Aunoa ma le Faaleagaina o Aia Tatau Faamaonia Faale-Tulafono ma Faatulagaga Faale-Tulafono Autu

            O le Mataupu 100 o le Faavae o Samoa e puipuia suafa matai faale-aganuu ma o le Mataupu 102 e puipuia fanua faale-aganuu. O lo o faailoa mai e nei mataupu e lua vaega tatau o le soifuaga faa Samoa e moomia lona faamamaluina ma puipuia. E taua le matafaioi a le Faamasinoga o Fanua ma Suafa e fai i nei tulaga taua e lua o le tofi o Samoa. E le gata i lea, e faapei o faatulagaga uma o malo e faia e tagata, e toetoe ona mautinoa le iai o auala e mafai ai e le Faamasinoga o Fanua ma Suafa ma lona sao i le aganuu a Samoa ona faamalosia ma faaleleia. Afai e faamaonia folasaga mai le Sosaiete a Loia o Samoa ma le Ofisa o Faamasinoga, o lea, o nei faaleleiga e mafai ona fai e aunoa ma le lamatia ai o aia tatau faale-tulafono ma le faatulagaga autu o le Faavae o Samoa. O suiga faale-tulafono o le faavae i soo se tulaga e matuia ona aafiaga ma fai ma mea e solia ai aia tatau faavae a tagata soifua. Matou te tatalo mo le faaeteete ma soalaupulega moomia, mo feutagaiga ma le faaleleia, a o lei avea nei fuafuaga ma tulafono. Matou te talitonu o suiga moomia o le Faamasinoga o Fanua ma Suafa e le tatau ona faaitiitia ai le mamalu o le faatulagaga o le Faavae o Samoa, pe faaleagaina ai aia tatau faavae ma le mamalu o so o se tagata ma o latou talitonuga eseese faale-lotu, faatinoga ma nuu.

            E pei ona faailoa mai e le folasaga a le Sosaiete a Loia o Samoa, pe le o faafitauli ea i le Faamasinoga o Fanua ma Suafa e mafua mai i le utiuti o punaoa ma faafitauli e aafia ai lona puleaina?[34] E manaomia ona tagai totoa i nei vaega e lua, ae o le taumafai e foia e ala i suiga faale-tulafono e aloese ai le Faamasinoga o Fanua ma Suafa mai iloiloga talafeagai faale-tulafono o talosaga o aia tatau faavae ma faamalepe ai le lotogatasi o iai nei o le ofisa o faamasinoga ua aloaia i le Faavae o Samoa matou te tuuina atu ua le aoga faafitauli ua latou faatulai mai.

I lea lava tulaga, o le tusi na tauaaoina atu i le Komiti e le Ofisa o Faamasinoga Samoa ua faailoa mai ai aafiaga talu ai nei i taumafaiga ua faamoemoe e “faaleleia ma aoaoina ai faamasino o le Faamasinoga o Fanua ma Suafa, e taulai i le tuuina atu i taimi talafeagai o faaiuga, aoaoina o faamasino fou, ma le taua o le faamaeaina o mataupu e tele naua ua leva ona taatitia a le Faamasinoga o Fanua ma Suafa”[35] ua fua mai ai ni iuga taua e aunoa ma le faaopoopoina o ni punaoa iloga. Sa faaalia e le Ofisa o Faamasinoga le popolega e faapea o le faatulagaga o lo o fuafuaina o le Faamasinoga o Fanua ma Suafa e tulai mai ai se faatulagaga o Faamasinoga tutusa ma tulaga tutoatasi ese ma o le a faatulai mai ai le anoanoai o galuega fai mo le Vaega o le Pulega o le Matagaluega o Faamasinoga i le Faamasinoga o Fanua ma Suafa. O le a manaomia ai e lenei faatulagaga le tele o ni punaoa mo le Faamasinoga fou, o lana aufaigaluega, ofisa ma potu mo faamasinoga.”[36]

I le ma lea matou te faamamafa atu o lenei folasaga ua leai sona faamoemoe e faaofi ma le talafeagai ai Lotu i totonu o mataupu faale-malo ma le faale-faamasinoga o le malo o Samoa. Ua na ona matou faailoa atu so matou leo o le lapataiga e faapea o le talia aloaia o Tulafono Taufaaofi 2020 o le a afaina ai le faatinoina ma le puipuia o aia tatau faavae a tagata soifua ua faamaonia ma faamamaluina e le faavae ma le tuuto faavaomalo, e aofia ai ma le saolotoga o lotu.

  1. Faaiuga

I le avea ai o se Ekalesia, o lo matou naunautaiga i lenei mataupu o le puipuia lea o le saolotoga o lotu ua faamaonia ma faamamaluina e le Faavae o Samoa mo lenei augatupulaga ma augatupulaga fai mai.

Matou te le talitonu i le gagana o le Tulafono Taufaaofi e faamautinoaina ai puipuiga faale-tulafono o iai nei o le saolotoga o lotu o le a faaauauina pea e aunoa ma le afaina. Matou te malamalama i le gagana o Tulafono Taufaaofi ma talitonu o le a afaina ai le faatinoina ma le puipuia o aia tatau a tagata soifua, ma faamalepeina ai le faatulagaga faavae o le auivi o le Faavae ua mamanu faatasi e o tatou tuaa o e na asaina le vaofilifili.

Matou te faafetaia le taumafaiga a le Komiti e folasia mafuaaga mo Tulafono Taufaaofi 2020 i Pulega a Alii ma Faipule o Afioaga ma Alalafaga i Samoa atoa. Ua matou matauina finagalo faaalia e ala i faasalalauga ma folasaga ua folasia i le Komiti ua faasilasila ai vaega taua ina ia liuliuina totoa. Ua matou faaoo atu foi lo matou leo ma lagona i lea tuufaatasiga ina ia auai ma faamoemoe e tuuina atu se sao i le soalaupuleina o lenei mataupu.

Matou te lagona le popoe ona o le talia aloaia o Tulafono Taufaaofi 2020 o le a aveesea ai tu ma aganuu masani a Samoa, faavaivaia ai le puipuia o le saolotoga o lotu, faamalepeina ai le faatulagaga autu o le Faavae o Samoa ma faamasinoga faale-tulafono, ma avea ma mea e le aloaia ai le vafealoaloai ma isi atunuu i lalo o tulafono faavaomalo. O le naunautaiga e faaaoga le tomai ma le silafia o matai e le manaomia ai le faavaivaiina o le puipuiga o aia tatau faavae po o le auivi autu faale-tulafono o le ofisa o faamasinoga na foafoaina e le Faavae.  

O le Faavae o Samoa o iai nei ma ana tulafono taualoa ua maua ai e tagata uma o Samoa le puipuiga o le saolotoga faavae o “mafaufauga, loto fuatiaifo ma lotu” ma tuuina mai ai tulaga aloaia e faamamaluina ai nei puipuiga e ala mai le Faamasinoga Sili ma le Faamasinoga o Talosaga. I le avea ai ma sui o faatuatuaga i Samoa mo se taimi umi, matou te valaau atu i le Komiti i le ava ma le migao e tatau ai ma le Palemene a Samoa ina ia manatua pea lava pea o le faatuatua ia Iesu Keriso o se vaega patino o le soifuaga o le tagata sili ma e ave iai le faamuamua. Sei o tatou faamamalu ma faamalosia le saolotoga o lotu ma le faatuatua ua foaiina mai e le Atua ma ia le laasia ai le va o le loto o tagata soifua taitoatasi ma lo latou Atua. A o tatou faia le mea silisili e puipuia ai o tatou saolotoga e tapuai ai ma soifua ai e pei ona taitaiina e o tatou loto ma loto fuatiaifo – o le a faamalosia o tatou aiga, nuu ma lo tatou atunuu atoa.

 


[2] Ofisa o le Komesina o Sulufaiga/Ofisa o Aia Tatau a Tagata Soifua o Samoa, Lipoti o le Tulaga o Aia Tatau a Tagata Soifua: O le a le Mamao ua Tatou o Mai Ai (Iuni 2019) [ua taua faapea o le Lipoti SSHR 2019], itulau 9.

[8] Tagai, mo se faataitaiga., Asiata v Asiata [2007] WSSC 4 92 Fepuari 2007]; Lafaialii v Loia Sili [2003] WSSC 8 (24 Aperila 2003); Mau Sefo ma Isi v Loia Sili [2000] WSSC 18; Tuivaiti (Tariu) v. Sila (Faamalaga) ma Isi (1980) WSLR 17 (17 Tesema 1980).

[10] Faavae o Samoa, Faatomuaga.

[11] . [2000] WSSC 47 (12 Iulai 2000). E iai ni talosaga na faaulu e Alii ma Faipule o Saipipi i Savaii ma lagolagoina e le FFS (LTC) na latou le amanaia ai ma faamalosia ni tapu i le saolotoga o tapuaiga. Na lagolagoina e le FFS le Fono i le faapea mai “ua lava lotu e tolu (3) mo tapuaiga a tagata o le afioaga o Saipipi.” Na faaleaogaina e le Faamasinoga Sili le vilivilita’i o le FFS e ui i ni tuuaiga e faapea o le lotu fou o se “pogai o feeseeseaiga i le va o matua ma a latou fanau” ma ua “avea ma faalavelave i le autalavou o le atunuu faapea foi ma i latou ua le malamalama,”  ma maitauina ai tulaga ua aafia ai nisi o fanau a le afioaga “ua foua le pule mamalu a Alii ma Faipule.”

[12] [Lipoti a le Komesina o Sulufaiga 2015, i le 60]

[13] Tagai mo se faataitaiga i le Lipoti o le Saolotoga o Tapuaiga 2019, US State Department, https://www.state.gov/reports/2019-report-on-international-religious-freedom/samoa/ (Vaega II-Faiga Masani a le Malo) (e iloa ai “o le aufono a matai, o le pulega faaleaganuu o afioaga, e masani ona tetee pea lava pea i taumafaiga e faaofi mai ai lotu fou i lo latou afioaga e faalagolago i le manatu e faapea “e tausia ai le nofo filemu i totonu o le afioaga” – o se tiute o loo faamatalaina i totonu o le tulafono. Ua ta’ua e nisi e faapea o se faiga foi ua masania’i i le tele o afioaga i le atunuu atoa le faasaina e taitai o tagata ona auai i lotu i fafo atu o le afioaga pe faaaoga lo latou aia tatau e aua ne’i tapuai ai.  O tagata o le nuu e solia nei tulafono e faasala, pe faatea ese mai le nuu, po o faasalaga uma e lua.  E masani lava, e mananao nuu ia tasi lava le lotu Kerisiano autu i le nuu. E masani ona filifili e matai o le nuu le lotu a o latou aiga potopoto. Na faapea ni faamatalaga, o le tele o nuu tetele e tele ni lotu o loo tautuaina ni tapuaiga eseese ma nonofo faatasi ai ma le filemu.»

[14]  Faamasinoga o Talosaga o Samoa, 15 Aperila 2019, faamaonia ai Lemalu Faalafua ma isi ma Su’a Pale Ltd. v Faamasinoga o Fanua ma Suafa ma isi. (Puipuia le Faaiuga a le Faamasinoga Maualuga, Tuala-Warren, J., 4 Tesema 2018).

[15] Id., para. 13 (faaopoopo le faamamafa).

[20] Id., para. 32-37. 

[25] Faavae Fautuaina Mataupu 104A(8), Tulafono Taufaaofi o le Teuteuga o le Faavae 2020, Mataupu 7

[26] Leoleo v. Ikilasi Raymond Isumu Vailopa, Faamasinoga Maualuga o Samoa (Apia, 2 Iulai 2009). Na ta’ua e le Faamasinoga e faapea o tautinoga e faia e se tamaitiiti ua molia e lei talafeagai ona tausaga faale-tulafono e aunoa ma sona matua po o le ua vaaia o ia e aveesea mai faamaoniga ina ia usitaia ai le maliega a Malo Aufaatasi i Aia Tatau o le Tamaitiiti. Na taua e le Faamasinoga o Samoa o se sui auai o le Maliega, ma faapea ua talafeagai, e ui e lei faia e Samoa “le isi laasaga o le tuuto atu atoatoa i la tatou matafaioi o le maliega … [e ala lea i le faia] o tulafono ma pulega talafeagai ma isi auala mo le faatinoga o aia tatau o loo aloa’ia i le Maliega o iai nei.” Ina ia lagolagoina ai le Maliega, ua faapea mai le Faamasinoga, “O lo o iai se pule maualuga e tatau ai i faamasinoga o lenei atunuu ona mulimulitaia le Maliega,” ma sii mai ai nisi o mataupu faale-faamasinoga talafeagai. I se tasi o nei mataupu, o Leoleo v. Faiga, [2008] WSSC 1996, na faapea mai le Faamasinoga: “Na poloaiina e le Faamasinoga o Talosaga i le avea ai ma faamasinoga aupito maualuga o le atunuu ia le Loia Sili v. Maumasi [1999]WSCA 1 e ao i Faamasinoga Samoa uma ona aloaia mataupu o le Maliega e faatatau i Aia Tatau o le Tamaitiiti i mataupu e tusa ai ma lona aotelega, o lona uiga o mataupu talafeagai.  E leai se tasi e faapei o Lord Cooke o Thorndon o le, i le tele o tausaga sa avea ma peresitene o le Faamasinoga o Talosaga Samoa, na saunoa e faapea o le mulimuli ai i faavae o le Maliega CRC e le na o se teuteu faamalama.”

[34] Folasaga a le Sosaiete o Loia Samoa, tagai i parakalafa 4.8-4.13, 5.11.

[35] Tusi o le Aso 6 Aperila 2020 mai Sui o le Ofisa o Faamasinoga i le Komesina o Tulafono Toeteuteu a Samoa [ua taua faapea “Tusi a le Ofisa o Faamasinoga”], para. 44.


Los artículos de esta sección no son oficiales pero han sido tomados de una fuente confiable y acreditada. La traducción es automática y puede dejar mucho que desear, sin embargo, a pesar de estas deficiencias, se ha realizado un esfuerzo para poner la información al alcance del público de habla hispana. Para ver el artículo completo original en inglés, consulta la siguiente Fuente: http://news-nz.churchofjesuschrist.org/article/church-submissions-to-the-samoa-parliamentary-select-committee

Dejar respuesta

Please enter your comment!
Please enter your name here